BP bərpa olunan enerji üzrə mütəxəssislərin hazırlanması ilə bağlı Azərbaycanda 3 illik ikili diplom proqramını həyata keçirəcək. Bu barədə 27 may tarixində BP-nin vitse-prezidenti Bəxtiyar Aslanbəyliyə istinadən APA xəbər verib.
Vitse-prezidentin sözlərinə görə, 3 il ərzində bərpa olunan enerji üzrə 120 mütəxəssisin hazırlanması planlaşdırılır: "İldə 40 tələbənin bu sahə üzrə magistr dərəcəsi alması planlaşdırılır. Yerli tələbələr evini tərk etmədən, əlavə xərc çəkmədən Böyük Britaniya universiteti və ADNSU-nun diplomunu alacaqlar”.
Bəxtiyar Aslanbəyli əlavə edib ki, layihə üzrə yerli universitetin bərpa olunan enerji sahəsində tədris imkanları genişlənəcək və üç il ərzində lazımi laboratoriya qurulacaq. Üç ildən sonra yerli universitet müstəqil və eyni keyfiyyətlə eyni proqramı davam etdirəcək.
