Dünyada ilk dəfə olaraq Azərbaycanda hava yastığı üzərində özü hərəkət edən yükdaşıyan barj inşa edilib. Bu haqda iyunun 27-də Azərbaycan Xəzər Dəniz Gəmiçiliyi məlumat yayıb.
Barjın uzunluğu 56 metr, eni isə 24 metrdir. Qurğu 150 ton yükgötürmə qabiliyyətinə malikdir və xüsusi hava yastıqlarının üzərində qurulub.
Nisbətən dayaz sularda istismar üçün nəzərdə tutulan özü hərəkət edən barjda iki ədəd su, iki ədəd hava pəri quraşdırılıb. Bu da onun buzlu sularda belə istismarını mümkün edir.
Barjın tikintisi Zığ gəmiqayırma zavodunda aparılıb. Tikinti prosesinə xarici mütəxəssislərin iştirakı ilə yanaşı, Zığ Gəmiqayırma Zavodunun və “Xəzər” MMC-nin insan və texnoloji resursları da cəlb olunub. “ACB Argymak” barjının sınaqları artıq uğurla başa çatıb. Proses başa çatdıqdan sonra üzən gəmi Qazaxıstana göndəriləcək. Barj “Kaşaqan” yatağında istismar olunacaq.
