Hazırda Azərbaycanda kiber hücumların 70%-ni fişinq hücumları təşkil edir. Bunu mayın 21-də Elektron Təhlükəsizlik Xidmətinin rəisi Şahin Əliyev “Rəqəmsal Dialoq” verilişində deyib.
“Dələduzlar zəng, SMS və elektron poçt üzərindən müxtəlif texnikalardan istifadə edərək vətəndaşlara aid fərdi məlumatları və maliyyə vəsaitlərini ələ keçirməyə çalışırlar”, - deyə qurumun rəsmisi vurğulayıb.
Onun sözlərinə görə, saxta zəng vasitəsilə bank məlumatlarının ələ keçirilməsi ilə bağlı hadisələr tez-tez baş verir. Ş.Əliyev əlavə edib ki, belə halların aradan qaldırılması üçün mobil operatorlarla birlikdə tədbirlər həyata keçirilib və nəticədə bu kimi halların sayı kəskin şəkildə azalıb.
