Azərbaycanda 2022-ci il may ayının 1-i vəziyyətinə əhalinin sayı 10 173 178 nəfər təşkil edib. Bu barədə məlumat Dövlət Statistika Komitəsinin 17 iyun tarixli hesabatında əks olunub.
Hesabata əsasən, əhalinin ümumi sayının 53%-ni şəhər, 47%-ini kənd sakinləri təşkil edir. Cari ilin 4 ayı ərzində ölkə üzrə 40 036 körpə doğulub. Doğulanlar arasında oğlanlar 53%, qızlar isə 47% təşkil edib. Körpələrdən 1 144-ü əkiz, 60-ı isə üçəm doğulanlardır.
Cari ilin yanvar-aprel ayları ərzində ölkədə 24 minə yaxın ölüm halı qeydə alınıb.
Sözügedən dövr ərzində 18 506 nikah və 5 043 boşanma halları qeydə alınıb. Ötən ilin müvafiq dövrü ilə müqayisədə nikahların sayı artıb, boşanmaların sayı isə azalıb.
