Əbülfəz Qədirqulu oğlu Əliyev (Elçibəy) 24 iyun 1938-ci ildə Ordubad rayonunun Kələki kəndində anadan olub.
O, Ordubad şəhər 1 saylı orta məktəbini bitirib. Daha sonra Əbülfəz Elçibəy Bakı Dövlət Universitetinin şərqşünaslıq fakültəsində təhsil alıb. Əliyev 1962-ci ildə təhsilini başa vuraraq SSRİ Hidrolayihə İnstitutunun Bakı şöbəsində tərcüməçi kimi işləyib. O, 1963-cü ildə Misirə yollanıb, 1964-cü ilin oktyabrına kimi Nil çayı üzərində Əsvan bəndinin tikintisində tərcüməçi kimi çalışıb.
Əbülfəz Elçibəy 1968-1975-ci illərdə BDU-nun “Asiya və Afrika ölkələri tarixi” kafedrasında müəllim və baş müəllim vəzifələrində çalışıb. O, 1976-cı ilin dekabrından AMEA-nın Əlyazmalar İnstitutunda müxtəlif vəzifələr tutub.
İctimai xadim 1980-ci illərin sonlarında yaranmış Azərbaycanda başlayan milli azadlıq hərəkatının rəhbərlərindən və Azərbaycan Xalq Cəbhəsinin qurucularından biri olub. 1995-ci ildən ömrünün sonuna kimi o, Azərbaycan Xalq Cəbhəsi Partiyasının rəhbəri olub.
1992-ci ilin iyun ayında Əbülfəz Elçibəy ilk dəfə demokratik səsvermə yolu ilə Azərbaycanın prezidenti seçilib. 1993-cü ildə isə hakimiyyətdən uzaqlaşaraq öz doğma Kələki kəndinə yollanıb.
Əbülfəz Elçibəy 22 avqust 2000-ci ildə Ankarada vəfat edib və Bakıda Fəxri xiyabanda dəfn olunub.
Mənbələr:
