Rəsul Rza 19 may 1910-cu ildə Göyçay şəhərində anadan olub. O, ilk təhsilini Göyçay orta məktəbində alıb.
Rəsul Rza 1920-ci illərdə Göyçayda dram dərnəyi yaradıb, şəhərdə, kəndlərdə tamaşalar verib. 14 yaşlı Rəsul Göyçay şəhər kitabxanasına müdir təyin edilib, 1925-ci ildən isə həmkarlar klubunda gənclər bölməsində işləyib. Şair 1927-1937-ci illərdə Zaqafqaziya Kommunist Universitetində, Azərbaycan Dövlət Elmi-Tədqiqat İnstitutunda, həmçinin Moskva Millətlər İnstitutunda və Ümumittifaq Dövlət Kinematoqrafiya İnstitutunda oxuyub.
Rəsul Rzanın “Bu gün” adlı ilk şeiri 1927-ci ildə Tiflisdə “Qığılcım” ədəbi almanaxında çap olunub. Onun məşhur əsərləri sırasında “Pəncərəmə düşən işıq”, “Duyğular, düşüncələr”, “Çinar”, “Dözüm”, “Üzü küləyə”, “Dünən, bu gün, sabah”, “Güneylər, quzeylər”i qeyd etmək olar. Şairin “Qızılgül olmayaydı” poeması Azərbaycan ədəbiyyatında repressiya qurbanlarına həsr olunmuş ən dəyərli əsərlərdən biri hesab edilir. Poemanın mövzusu Müşfiqin həyatından götürülüb.
Xalq şairi Böyük Vətən müharibəsi iştirakçısı olub. Müharibə illərində hərbi müxbir işləyən Rəsul “Vətən”, “İntiqam! İntiqam…” kitabları, “Ölməz qəhrəmanlar”, “Qəzəb və məhəbbət” hekayə və oçerk topluları, “Vəfa” pyesini yazıb.
1939-cu ildə Rəsul Rza Azərbaycan Yazıçıları İttifaqının sədri, 1945-1948-ci illərdə Azərbaycan Kinematoqrafiya naziri, 1966-1975-ci illərdə Azərbaycan Ensiklopediyasının baş redaktoru işləyib. Şair 1960-1981-ci illərdə Asiya və Afrika Ölkələri ilə Respublika Həmrəylik Komitəsinin sədri olub, 1964-cü ildə isə SSRİ Yazıçılar İttifaqı İdarə Heyətinin üzvü seçilib.
Rəsul Rza “Azərbaycan SSR xalq şairi” fəxri adına layiq görülüb, “Şərəf nişanı”, üç dəfə “Lenin” ordeni və s. medallarla təltif olunub.
11 aprel 1981-ci ildə Rəsul Rza Bakı şəhərində ürək çatışmazlığından vəfat edib və Fəxri Xiyabanda dəfn olunub. Hazırda Göyçay şəhərində onun ev muzeyi fəaliyyət göstərir və paytaxtın küçələrindən biri onun adını daşıyır.
20 dekabr 2013-cü ildə Göyçay rayonunda Rəsul Rza haqqında çəkilmiş “...yaşıl atlas, ömürdən səhifələr” filminin təqdimatı olub.
