Azərbaycanı təmsil edən Orxan İbadov Almaniyanın Hasfurt Regional Gimnaziyasında “Memory XL” Almaniya Yaddaş Çempionatında qalib olub. Bu barədə mayın 25-də APA məlumat verib.
O, 5 735 xal yığaraq “Almaniyanın ən güclü yaddaşı” adına layiq görülüb. İkinci yerdə İtaliyanın intellektual ulduzu Emanuele Regnani, üçüncü yerdə isə isveçrəli Susanne Hippauf qərarlaşıb.
Yarışda Azərbaycandan əlavə, Almaniya, Belçika, Fransa, İsveçrə və Danimarkanın yaddaş atletləri iştirak edib.
O. İbadov sıra ilə 5 dəqiqəyə 31 ad və soyadı, 5 dəqiqəyə 360 rəqəmi, 5 dəqiqəyə 272 şəkli, 5 dəqiqəyə 63 süni tarixi faktı və 27 səsli rəqəmi düzgün yadda saxlayaraq 10 kateqoriyanın 5-də birincilik əldə edib. O, dünyanın ən güclü 16 yaddaşlısından biridir.
36 yaşlı Orxan İbadov 2005-ci ildə Bakı Dövlət Universitetinin Hüquq fakültəsinin bakalavr, 2007-ci ildə isə magistr pilləsini bitirib. O, İspaniyanın Barselona şəhərində yaşayır və elektron ticarət sahəsində İspaniyanın aparıcı mütəxəssislərindən biri sayılır.
