Bağçalarda ən çox rast gəlinən problem ərzaq məhsulları ilə təmizlik vasitələrinin birgə saxlanılmasıdır. Eyni zamanda çiy və bişmiş məhsullar bir yerə yerləşdirilir. Bu haqda dekabrın 9-da Qida Təhlükəsizliyi Agentliyindən (AQTA) məlumat verilib.
“Çirkli tərəvəzlərlə, süd, ət məhsulları eyni yerdə saxlanılır. Bu da çarpaz çirklənməyə səbəb olur. Həmçinin bağçalarda uşaqlara tələb olunan qidalı maddələr, eyni zamanda kalori çatdırılmır”, - deyə qurumun əməkdaşı Şəhla Yusifzadə bildirib.
AQTA tərəfindən oktyabrın 4-dən dekabrın 1-nə qədər Bakı və regionlarda ümumilikdə 220 məktəbəqədər təhsil müəssisəsində monitorinq həyata keçirilib. Onlardan 205-də 1236 nöqsan aşkarlanıb. Kobud pozuntuları olan 183 bağçanın məsul şəxsləri barəsində tədbirlər görülüb.
Məlumatda qeyd edilib ki, yoxlamalar özəl bağçalarda da aparılacaq.
Qurum valideynləri uşaqlarını göndərdikləri təhsil müəssisələrinin texniki, sanitar-gigiyenik vəziyyəti ilə maraqlanmağa çağırıb: “Bu, valideynlərin hüququdur və onları bundan heç kim məhrum edə bilməz”.
