Bakıda Rusiya Federasiyasının Həştərxan vilayətinin İşgüzar Mərkəzinin rəsmi açılışı olub. Bu barədə Report 7 dekabr tarixində məlumat verib.
Bugün iqtisadiyyat naziri Mikayıl Cabbarov Bakıda səfərdə olan Rusiya Federasiyasının Həştərxan vilayətinin qubernatoru İqor Babuşkinin rəhbərlik etdiyi nümayəndə heyəti ilə görüşüb. Tərəflər arasında 2022-ci il üçün əməkdaşlığın inkişafı üzrə Tədbirlər Proqramı imzalanıb.
Həmçinin Həştərxan Dövlət Universitetinin Təhsil, elm və texnologiya Mərkəzinin ofisinin açılışı baş tutub.
Həştərxan Beynəlxalq Əlaqələr Agentliyinin rəhbəri Vladimir Qolovkovun sözlərinə görə, 2021-ci ildə tək sentyabr ayı ərzində 18 mindən çox rusiyalı Azərbaycana səfər edib.
“Bu göstərici ötən ilin eyni dövrü ilə müqayisədə 65% çoxdur”, - deyə Agentliyin rəhbəri əlavə edib.
Qeyd edək ki, 2018-ci ildə Həştərxanın şəhərində Azərbaycanın İşgüzar Mərkəzi açılıb. Mərkəzin tikintisi Heydər Əliyev Fondu tərəfindən maliyyələşdirilib. Onun inşasına 208 milyon rubl vəsait ayrılıb.
