Bakıda azyaşlı diş əməliyyatından sonra vəfat edib. Bu barədə İnsanoid bu gün, 3 iyul tarixində xəbər verir.
Ötən gün Nərimanov rayonunda yerləşən 5 nömrəli Uşaq Stomatoloji Poliklinikasında dişi əməliyyat olunan 5 yaşlı Mirbəhram Vəkillinin halı pisləşib və o, həmin gün vəfat edib.
TƏBİB-dən bildirilib ki, müvafiq müayinələrdən sonra ona tibbi xidmət göstərilib, uşaqda yuxarı azı dişinin periodontiti diaqnozu ilə dişin əməliyyatı həyata keçirilib.
Məlumata görə, azyaşlı dişin ekstraksiyası sonrası anafilaktik şok keçirib:
“Ona tibb müəssisəsində ilkin tibbi yardım göstərilib və təcili tibbi yardım briqadası çağırılıb.
Lakin uşağın valideyni təcili tibbi yardım briqadasının gəlməsini gözləmədən uşağı yaxınlıqdakı bir neçə özəl klinikaya aparıb.
Təcili tibbi yardım briqadası protokol üzrə çağırışdan 15 dəqiqə sonra tibb müəssisəsində olub.
Bir neçə özəl tibb müəssisəsi uşağı qəbul etməkdən imtina etdiyi üçün valideynləri onu Kliniki Tibbi Mərkəzin Təcili yardım şöbəsinə gətiriblər. Aparılmış reanimasion tədbirlərə baxmayaraq, xəstəni xilas etmək mümkün olmayıb.
Ailənin bildirdiyinə görə, azyaşlıda ürək qüsuru və autizm sindromu olub”.
Baş Prokurorluğun Mətbuat Xidmətindən saytımıza bildirilib ki, hadisə ilə bağlı Nərimanov Rayon Prokurorluğunda araşdırma aparılır.
