Nəsimi rayonu, Bülbül prospekti 18-30 ünvanında ağacın kəsilməsi ilə bağlı rayon bələdiyyəsinin rəhbərliyi 5000 manat məbləğində cərimələnib. Bu barədə iyunun 7-də Ekologiya və Təbii Sərvətlər Nazirliyindən məlumat verilib.
Araşdırma zamanı müəyyən edilib ki, Nəsimi Rayon Bələdiyyəsi sözügedən ərazidə qəzalı vəziyyətdə olan 1 safora ağacının götürülərək yerində yeni ağacın əkilməsi ilə bağlı Dövlət Ekoloji Ekspertiza Agentliyinə müraciət edib.
Verilmiş ekspertiza rəyinin tələblərinə əməl olunmadığı üçün rayon bələdiyyəsinin rəhbərliyi vəzifəli şəxs qismində 5000 manat məbləğində cərimələnib.
Qeyd edək ki, həmin ərazidə ağac kəsilərək yerində qanunsuz şəkildə parklanma yeri yaradılmışdı. Parkinqin Azərbaycan Kinematoqrafçılar İttifaqı tərəfindən yaradıldığı məlum olub.
