Azərbaycanda 9 il əvvəl baş vermiş qətlin üstü açılıb. Bu barədə mayın 24-də Baş Prokurorluq və Daxili İşlər Nazirliyi birgə məlumat yayıb.
Belə ki, 2013-cü il martın 30-da Yasamal rayonu ərazisində İsmayıl Zeynalovun üzərində zorakılıq əlamətləri olan meyiti aşkarlanıb. Cinayəti törətmiş şəxsi müəyyən etmək mümkün olmadığından cinayət işinin icraatı dayandırılıb.
Aparılmış istintaq-əməliyyat tədbirləri nəticəsində məlum olub ki, Zaur Sadıxov 29 mart 2013-cü il tarixdə tanışı İsmayıl Zeynalovla narkotik vasitə qəbul etdikdən sonra evə qayıdarkən avtomobildə aralarında mübahisə ediblər.
Zaur Sadıxov avtomobili yolda saxlayaraq maşından enməyə çalışan İsmayıl Zeynalova yaxınlaşıb ona təpiklə zərbələr vurub və əlləri ilə onu boğaraq öldürüb. Daha sonra narkotik vasitənin doza həddini aşması səbəbi ilə ölməsi görüntüsünü yaratmaq üçün onu küçədə səki üstünə sürüyüb, uzanıqlı formada orada qoyaraq hadisə yerindən uzaqlaşıb.
Zaur Sadıxov şübhəli şəxs qismində tutularaq istintaqa cəlb edilib.
