Bərdədə oğlan əmisi qızını öldürmək istəyib.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər Məhkəməsində keçirilib.
Belə ki, təqsirləndirilən Səbuhi 1991-ci ildə Bərdə rayonunda doğulub. O, əmisi qızı, zərərçəkmiş Zəminənin həyat yoldaşından ayrılma qərarını eşidərkən əsəbiləşib.
Hadisə günü Zəminə köhnə Bərdə bazarı adlanan ərazidə Səbuhini görüb. Ona ərindən polisə şikayət edəcəyini, öz həyatını istədiyi kimi yaşayacağını deyib. Səbuhi bunu ailəsi və qohumlar arasında biabırçı hadisə olduğunu düşünərək onu öldürmək qərarına gəlib. Cinayəti həyata keçirmək və heç kimin görməməsi üçün Zəminəyə mağazaların arxasına getməsini deyib. Özü bıçaq götürdükdən sonra həmin yerə gedib.
Zəminədən yüngül həyat tərzi keçirməyə son qoymasını tələb edib. Buna baxmayaraq sonuncunun ona saymazlıq göstərməsindən hiddətlənərək əlindəki bıçaqla 3 dəfə qadının boğazını kəsib. Sonra isə onun öldüyünü düşünərək hadisə yerindən qaçıb.
Səbuhi Azərbaycan Respublikası CM-nin 29,120.2.4-cü (xüsusi amansızlıqla qəsdən öldürməyə cəhd) maddələri ilə təqsirləndirilib.
“Öz həyatımı yaşayıram dedikdə boğazını kəsdim…”
Məhkəmədə təqsirləndirilən Səbuhi cinayət üzrə özünü təqsirli bilib:
“Mənə polisə gedib şikayət etdiyini deyəndə əsəbiləşdim. Niyə təkbaşına şöbəyə getdiyini, keçirtdiyi həyat tərzinin ailəsinə, qohumlarımızın adına yaraşmadığını dedim. Çünki Zəminə iki dəfə ailə qurmuşdu. Zəminə öz həyatımı yaşayıram dedikdə əsəbiləşib əlimdəki bıçaqla onun boğazını kəsdim. Əməlimdən peşmanam”.
“Bünyad 3-cü ərim idi, boşanırdım…”
Daha sonra məhkəmədə zərərçəkmiş Zəminə məhkəmədə ifadə verib:
“Bünyad mənim 3-cü ərimdi. O, evdəki qızıllarımı götürüb, sevgilisi ilə qaçdı. Hadisə günü Səbuhiyə yaxınlaşıb ailədə olan problemləri danışdım. O da mənə həyat tərzimin doğru olmadığını, ailəmin başını aşağı saldığımı bildirdi. Saçımdan tutub boğazımı kəsdi. Yerə yıxıldım, yenə xəsarət yetirdi”.
Məhkəmənin qərarı ilə Səbuhi 14 il müddətində azadlıqdan məhrum edilib.
Fidan İlqar
