Daha 4 rayon (Şəmkir, Qazax, Tovuz, Salyan) üzrə 18 Vətən müharibəsi veteranı və şəhid ailəsi üzvü üçün kiçik heyvandarlıq təsərrüfatları yaradılıb. Bu barədə 18 oktyabr tarixində Kiçik və Orta Biznesin İnkişafı Agentliyi məlumat verib.
Layihəyə uyğun olaraq, həmin şəxslərə simmental cins iribuynuzlu damazlıq heyvanlar, sağım aparatı, qaşov, yemqıran və xüsusi yemlər təqdim edilib. Verilmiş aktivlər hesabına onlar öz kiçik təsərrüfatlarını yaradıblar.
Layihə iştirakçılarına sahibkarlıq fəaliyyətinin inkişafı üçün mentor dəstəyi və satış bazarlarına çıxış imkanlarının genişləndirilməsi üçün köməklik də göstəriləcək.
Ümumilikdə, 200 nəfəri əhatə edəcək layihə çərçivəsində bu günədək 144 vətəndaş aktivlərlə təmin edilib. Yaxın vaxtlarda qeyd edilən kateqoriyalara aid daha 56 vətəndaş üçün kiçik təsərrüfatlar yaradılacaq.
