Hökümə Abbasəli qızı Qurbanova 11 iyun 1913-cü ildə Bakıda ziyalı ailəsində anadan olub. Onun anası Malikat xanım bəstəkar Müslüm Maqomayevin bacısı idi.
Qurbanova 1931-ci ildə Bakı Pedaqoji Texnikumunu bitirib, daha sonra keçmiş Azərbaycan Dövlət Konservatoriyasının fortepiano sinfində təhsil alıb. Konservatoriyada oxuduğu illərdə Hökümə xanımın aktrisalıq istedadı dramaturq Cəfər Cabbarlının diqqətini çəkib. Məhz onun təşəbbüsü ilə Qurbanova “Almaz” filmində Yaxşı rolunu ifa edib.
Aktrisa 1938-ci ildən ömrünün sonunadək Dram Teatrında çalışıb. O, teatr səhnəsində Hüseyn Cavidin “Şeyx Sənan” əsərində “Xumar”, Vilyam Şekspirin “Antoni və Kleopatra” əsərində “Kleopatra”, Cəfər Cabbarlının “Od gəlini” faciəsində “Solmaz” obrazlarını yaradıb. Aktrisa, həmçinin “Bir ailə” filmində “Leyla”, “Onu bağışlamaq olarmı?”da “Laçın”, “Mən rəqs edəcəyəm”də “Mahmudun anası”, “İnsan məskən salır”da “ana” rollarını ifa edib.
Aktrisa 1943-cü ildə Azərbaycan SSR-nin Əməkdar artisti, 1960-cı ildə Azərbaycan SSR-nin Xalq artisti, 1965-ci ildə isə SSRİ Xalq artisti fəxri adlarına layiq görülüb.
Hökümə Qurbanova iki çağırış Azərbaycan SSR Ali Sovetinin deputatı olub.
Hökümə Qurbanova 2 noyabr 1988-ci ildə Bakıda vəfat edib və Birinci Fəxri xiyabanda dəfn olunub.
