Əliyar Yusif oğlu Əliyev 14 dekabr 1957-ci ildə Qubadlı rayonunun Qəzyan kəndində anadan olub.
O, ilk təhsilini kənd məktəbində alıb, 1979-cu ildə isə indiki Azərbaycan Dövlət Bədən Tərbiyəsi və İdman Akademiyasını bitirib. Təhsilini bitirdikdən sonra Əliyev bir müddət Rusiyada Saransk Dövlət Universitetində müəllim kimi çalışıb. Daha sonra isə Vətənə qayıdaraq, Qubadlıdakı Dondarlı kənd məktəbində idman müəllimi işləyib.
Birinci Qarabağ müharibəsi başlayan zaman Əliyev könüllü olaraq, ordu sıralarına yazılıb. O, Qubadlıda idman cəmiyyətinin üzvlərindən ibarət sonralar “Pəhləvanlar taboru” kimi tanınan tabor təşkil edib. Əliyar Əliyev 1992-ci ildə 40 könüllü döyüşçü ilə birlikdə işğal altındakı Laçının 40-a yaxın kəndini 4 gün ərzində ermənilərdən azad edib.
Əliyar Əliyev 3 oktyabr 1992-ci ildə Laçının 2 kilometrliyində olan “Tikanlı zəmi” yüksəkliyi uğrunda gedən döyüşdə şəhidlik zirvəsinə ucalıb. Daha sonra o, Qubadlı rayonunun Qəzyan kəndində dəfn olunub. Əliyev 10 noyabr 1992-ci ildə “Azərbaycanın Milli Qəhrəmanı” adına layiq görülüb.
44 günlük Vətən müharibəsində Qubadlı işğaldan azad edildikdən bir müddət sonra Əliyar Əliyevin qəbirüstü abidəsi bərpa edilib.
