Azərbaycan xalqı Beynəlxalq Müəllimlər Gününü hər il 5 oktyabr tarixində qeyd edir. Müəllimlər Gününün bu tarixdə qeyd edilməsi UNESCO-nun 5 oktyabr 1966-cı ildə verilən qərarı ilə bağlıdır. Həmin il təşkilat tərəfindən müəllimlərin statusunun artırılması ilə bağlı tövsiyə xarakterli sənəd qəbul olunub. 1994-cü ildə UNESCO 5 oktyabr tarixini Beynəlxalq Müəllimlər Günü elan edib.
XX əsrin əvvəllərində Azərbaycanda ibtidai təhsilin mütləq və pulsuz şəkildə olması təklif olunub. Bu zaman məktəblərimizdə xalq arasında tanınmış maarifçi Həsən bəy Zərdabinin həyat yoldaşı Hənifə Məlikova, yazıçı Nəcəf bəy Vəzirovun qızı Sara xanım dərs keçirdilər.
Sovet dövründə SSRİ-nin tərkibində olan respublikalarda Müəllimlər Günü oktyabr ayının ilk bazar günündə qeyd edilirdi.
2022-ci ilin statistik məlumatına görə, Azərbaycanda dövlət və qeyri-dövlət ümumi təhsil müəssisələrində 89409 müəllim çalışır. Onlardan ən çox fənn müəllimi sayını 16310 nəfər olmaqla Azərbaycan dili və ədəbiyyat üzrə müəllimlər təşkil edir.
