Bu gün, iyunun 10-da "Formula 1" və "Formula 2" üzrə Azərbaycan Qran-prisi start götürür. Bu barədə Bakı Şəhər Halqası Əməliyyat Şirkəti məlumat verib.
Bu, Bakıda keçirilən 6-cı "Formula 1" yarışıdır.
İlk yarış günündə "Formula 1"də iki sərbəst yürüş, "Formula 2"də isə sərbəst yürüş və sıralama turu baş tutacaq. Sərbəst yürüşə öncə "Formula 2" pilotları olan 11 komandanın 22 sürücüsü qatılacaq. Daha sonra isə "Formula 1"in birinci sərbəst yürüşü başlayacaq.
Hazırda dünya çempionu olan "Red Bull" komandasının pilotu Maks Ferstappen "Formula 1"də 125 xalla birinci yerdə qərarlaşıb. "Ferrari" pilotu Şarl Lekler 116 xalla ikinci, "Red Bull"un digər sürücüsü Serxio Peres 110 xalla üçüncü pillədə yer alıb.
Azərbaycan Qran-prisi iyunun 12-də başa çatacaq.
Daha öncə Bakıda baş tutan yarışlarda "Mercedes"in sabiq pilotu Niko Rosberq, "Red Bull"un keçmiş pilotu, hazırda isə "McLaren"da çıxış edən Daniel Rikkardo, "Mercedes"in pilotu Lüis Hemilton, daha sonra onun komanda yoldaşı Valtteri Bottas və "Red Bull"da çıxış edən Serxio Peres qalib olublar. 2020-ci ildə keçirilməli olan Azərbaycan Qran-prisi koronavirus pandemiyasına görə ləğv edilib.
