17 oktyabr 2020-ci ildə Azərbaycan Ordusu Füzuli şəhərini Ermənistan Silahlı Qüvvələrinin işğalından azad edib.
Füzuli əməliyyatı İkinci Qarabağ müharibəsində cənub-şərq cəbhəsində baş verən ən əhəmiyyətli döyüşlərdən biri olub. Həmin gün Füzuli şəhəri ilə yanaşı, rayonun daha 7 yaşayış məntəqəsi - Qoçəhmədli kəndi, Çimən kəndi, Cuvarlı kəndi, Pirəhmədli kəndi, Musabəyli kəndi, İşıqlı kəndi, Dədəli kəndi işğaldan azad olunub.
26 noyabr 2020-ci ildə “Füzulinin azad olunmasına görə” medalı təsis edildi. Prezident İlham Əliyevin 2020-ci ilin dekabrın 25-də və 2021-ci ilin iyunun 24-də imzaladığı müvafiq sərəncamlara əsasən, bir qrup hərbi qulluqçu “Füzulinin azad olunmasına görə” medalı ilə təltif edilib.
Füzulinin əsası 1827-ci ildə qoyulub və ilkin adı Qarabulaq olub. Füzuli rayonu 23 avqust 1993-cü ildə Ermənistan Silahlı Qüvvələri tərəfindən işğal olunmuşdu.
