Səyavuş Aslan 5 sentyabr 1935-ci ildə Bakı şəhərində anadan olub.
Səyavuş Aslan 1963-1969-cu illərdə Azərbaycan Dövlət İncəsənət İnstitutunda musiqili komediya aktyorluğu ixtisası üzrə ali təhsil alıb. O, əmək fəaliyyətinə 1957-1958-ci illərdə Azərbaycan Dövlət Estrada Birliyində başlayıb.
Aktyor 1958-1959-cu illərdə Quba Dövlət Dram Teatrında, 1959-1984-cü illərdə Azərbaycan Dövlət Musiqili Komediya Teatrında, 1984-1994-cü illərdə isə Azərbaycan Dövlət Akademik Milli Dram Teatrında aktyor kimi çalışıb. 1994-cü ildə o, Azərbaycan Dövlət Musiqili Komediya Teatrına bədii rəhbər təyin edilib. 1996-cı ildə Səyavuş Aslan yenidən Akademik Milli Dram Teatrına qayıdıb.
Aktyor “Yol əhvalatı”, “Yuxu”, “Bəyin oğurlanması”, “Ulduz”, “Əhməd haradadır”, “Romeo mənim qonşumdur” filmlərində, “Hicran”, “Yaşıl eynəkli adam”, “Hamlet”, “Böyük Romul”, “Ax, Paris, Paris”, “Mənim sevimli dəlim”, “Poçt şöbəsində xəyal”, “Varlı qadın”, “Sevgililərin cəhənnəmdə vüsalı”, “Bizim qəribə taleyimiz” tamaşalarında, “Qayınana əməliyyatı” və digər film və tamaşalarda rol alıb.
Səyavuş Aslan “Şərəf”, “Şöhrət” ordenləri və “Azərbaycan Respublikası Prezidentinin fəxri diplomu” ilə təltif olunub. Həmçinin o, Əməkdar artist və Xalq artisti adlarına layiq görülüb.
Səyavuş Aslan 27 iyun 2013-cü ildə vəfat edib. O, İkinci Fəxri xiyabanda dəfn olunub.
