Nigar Rəfibəyli 23 iyun 1913-cü ildə Gəncə şəhərində anadan olub. Nigar xanımın babası Ələkbər bəy Rəfibəyli siyasətçi, atası Xudadat bəy Rəfibəyli isə Azərbaycanın ilk ali təhsilli cərrahlarından biri olub.
O, ibtidai təhsilini Gəncədə tamamladıqdan sonra Bakı Pedaqoji Texnikumuna qəbul olub. Təhsilini başa vurduqdan sonra Rəfibəyli pedaqoji fəaliyyətə başlayıb və bədii yaradıcılıqla məşğul olub.
Nigar Rəfibəylinin yazdığı ilk şeiri “Çadra” 1928-ci ildə “Dan ulduzu” jurnalında dərc olunub. Şairənin “Zəfər nəğməsi”, “Şeirlər”, “Anaların səsi”, “Yol xatirələri”, “Dənizin səsi gəlir” və başqa kitabları nəşr edilib. O, bədii yaradıcılıqla bərabər, tərcüməçi və redaktor kimi fəaliyyət göstərib. Nigar Rəfibəyli təbiət, sevgi, Azərbaycanla bağlı müxtəlif mövzular, həmçinin dünya xalqlarının da həyatından bəhs edən şeirlər yazıb.
Nigar “Əməkdar mədəniyyət işçisi” və “Xalq şairi” fəxri adlarına layiq görülüb, “Şərəf” nişanı və digər medallarla təltif olunub.
Rəfibəyli Xalq şairi Rəsul Rza ilə evli idi. Bu evlilikdən onların üç övladı olub və onlardan biri Xalq yazıçısı Anar Rzayevdir.
Nigar Rəfibəyli 9 iyul 1981-ci ildə Bakıda vəfat edib və İkinci Fəxri xiyabanda dəfn olunub. Bakı küçələrindən biri onun adını daşıyır.
