Buzovnada dəniz sahilindəki qanunsuz hasar və tikililər sökülür. Bu barədə Report-a Bakı Şəhər İcra Hakimiyyətindən məlumat verilib.
10-15 il əvvəl burada bəzi insanlar tərəfindən dəniz kənarlarının hasarlanması, sahilə keçidlərin bağlanması, həmçinin qədim qayalıqların zibillənməsi hallarına yol verilib. Bu da sakinlərin narazılıqlarına səbəb olub.
Bəzi yerlərdə sakinlər qanunsuz olaraq əlavə torpaq sahələrini zəbt edib, öz həyətlərinə birləşdiriblər. Həm də dənizin geri çəkilməsi ilə əlaqədar sahilyanı ərazilər genişlənib.
Hal-hazırda zəbt edilən torpaq sahələrinin hasarları, ərazidə bəzi sənədsiz tikililər, çimərlik ərazisinə daxil olmağa mane olan sədlər sökülür. Həmçinin qayalıq ərazilərin müxtəlif tullantılardan təmizlənməsinə başlanılıb.
Bildirilib ki, təmizlənən torpaq sahələri çimərlik ərazilərinə birləşdiriləcək və əraziyə nəzarət artırılacaqdır.
Qeyd edək ki, iyunun 12-də Buzovna sakinləri qayalıqların yerində yeni tikililərin inşasından narahatlıqlarını bildirmişdilər. Onlar video paylaşaraq Prezidentə müraciət etmişdirlər.
[URIS id=55343]
