Cəbrayıl sakinlərinə qarşı dələduzluq edən şəxslərin məhkəməsi başlayır. Bu barədə mayın 12-də Baş Prokurorluqdan məlumat verilib.
Paytaxt sakini Sədaqət Əzizovanın qabaqcadan əlbir olduğu şəxslərlə birlikdə bir neçə vətəndaşa qarşı dələduzluq etməsi faktı ilə bağlı başlanan cinayət işinin ibtidai istintaqı tamamlanıb.
Araşdırmalarla müəyyən edilib ki, Sədaqət Əzizova özünü Səhiyyə Nazirliyinin vəzifəli şəxsi kimi təqdim edib, digər şəxslərlə əlbir olaraq vətəndaşlara sosial müavinətlərini yenidən bərpa etdirəcəyinə dair yalan vədlər verib. Onlar ümumilikdə 5 861 min manat pulu ələ keçiriblər.
Sədaqət Əzizova, Elçin Abışov, Aybəniz İbişova və Vasif Abışov “qabaqcadan əlbir olan bir qrup şəxs tərəfindən dələduzluq”, “vəzifəli şəxsin səlahiyyətlərini mənimsəmə”,“rüşvət verməyə təhrik etmə” və digər maddələrlə ittiham olunublar.
Hazırda cinayət işi baxılması üçün məhkəməyə göndərilib.
