Cari ilin ilk ayında Azərbaycan dünyanın 118 ölkəsi ilə ticarət əməliyyatarı aparıb. Bu barədə 14 mart tarixində dərc edilmiş Dövlət Statistika Komitəsinin hesabatında deyilir.
Qeyd edilib ki,66 ölkəyə məhsul ixrac edilib, 111 ölkədən isə idxal olunub. 2022-ci ilin yanvar ayında xarici ticarət dövriyyəsi 3,9 milyard dollardan çox olub. Bu da ötən ilin yanvar ayına nisbətən real ifadədə 17,8% artım deməkdir.
Xarici ticarət dövriyyəsinin 38,6%-i İtaliya, 10,9%-i Türkiyə, 5,8%-i Ukrayna, 5,1%-i isə Rusiyanın payına düşüb. İxracda əsas tərəfdaşlar İtaliya (50,1%), Türkiyə (9,4%) və Ukraynadır (6,5%). İdxalda isə əsas partnyorlar Türkiyə (15,8%), Çin (14,5%) və Rusiyadır (13,8%).
Hesabat dövründə Azərbaycan 232,2 milyon dollarlıq qeyri-neft-qaz məhsulları ixrac edib. Bu da ötən ilin yanvar ayı ilə müqayisədə 1,6 dəfə çoxdur. Həmin məhsullar, əsasən, Rusiyaya (30,6%), Türkiyəyə (30,4%) və Gürcüstana (6,2%) ixrac edilib.
