Bir ilə yaxındır ki, icbari tibbi sığorta sistemi bütün ölkəni əhatə edir. Lakin sosial şəbəkələrdə sığortadan istifadə etməyə çalışan vətəndaşların şikayət etdikləri müşahidə olunur. Bəziləri onlar üçün lazım olan xidmətlərin Xidmətlər Zərfidə olmadığını, bəziləri isə həkimlərin pul qazanmaq üçün xəstələri qəsdən get-gələ saldıqlarını yazırlar. İcbari tibbi sığorta sahəsində olan boşluqlar barəsində dekabrın 10-da Report araşdırma aparıb.
Milli Məclisin Səhiyyə komitəsinin üzvü Müşfiq Məmmədli bildirib ki, əhalinin icbari tibbi sığorta sahəsində maarifləndirilməsinə ehtiyac var: “Vətəndaşlar öz hüquqlarını bilmir, eləcə də tibb işçilərimizdə də boşluqlar var. Təcili yardım xidmətinin standartlara uyğun şəkildə fəaliyyət göstərməməsi də çatışmazlıqlardan biridir”.
Həmçinin o, Xidmətlər Zərfinin bütün xidmətləri əhatə etməsindən danışıb: “Həyati vacib istiqamətlər üzrə xidmətlərin zərfə daxil edilməsinə ehtiyac var. Özəl xəstəxanalara axının səbəbləri sırasında bəzi xidmətlərin sırf özəl tibb müəssisələrində göstərilməsi, eləcə də insanların təcili yardımı operativ şəkildə alması ehtiyacı dayanır”.
Müşfiq Məmmədli tibbi personalın hazırlıq səviyyəsinin qaneedici olmaması məsələsini də vurğulayıb. Bu problemin qarşısını almaq üçün o, tibbi təhsil və bacarıqların təkmilləşdirilməsini təklif edib.
Məsələ ilə bağlı İcbari Tibbi Sığorta üzrə Dövlət Agentliyindən bildirilib ki, vətəndaşların maarifləndirlməsi istiqamətində bu ilin on ayı ərzində müxtəlif işlər aparılıb. Həmçinin məlumat verilib ki, sosial şəbəkə və müxtəlif kanallar vasitəsilə daxil olan 22 636 vətəndaş müraciəti cavablandırılıb.
Agentlikdən əlavə edilib ki, hazırda Xidmətlər Zərfi çərçivəsində 2 550 sayda tibbi xidmət göstərilsə də, gələcəkdə bu sayın 2800-ə çatdırılması nəzərdə tutulub.
Eyni zamanda vurğulanıb ki, TƏBİB-in tabeliyində olan dövlət tibb müəssisəsi tərəfindən verilən göndəriş vərəqəsi ödənişsiz şəkildə təqdim edilir. Vətəndaşlardan bununla bağlı ödəniş etmələri tələb edilərsə, TƏBİB-in (012) 310-17-70 nömrəsi ilə əlaqə saxlaya, [email protected] elektron poçt ünvanına yaza və ya rəsmi ünvanına (İsmayıl Hidayətzadə küç. 11) müraciət edə bilərlər.
Qeyd edək ki, 2022-ci ildən etibarən əhalinin əmək haqqısından icbari tibbi sığorta üçün 1% deyil, 2% vəsait tutulacaq.
