Daxili İşlər Nazirliyi İmişli rayonunda 14 yaşlı qızın nişanlanmasına münasibət bildirib. Bu haqda dekabrın 29-da qurumun rəsmisi baş leytenant Nizam Həmidov Oxu.Az-a açıqlama verib.
Onun sözlərinə görə, faktla bağlı İmişli Rayon Polis Şöbəsi tərəfindən bütün tədbirlər icra olunub və digər dövlət qurumları məlumatlandırılıb.
“Azyaşlının valideynləri polis şöbəsinə dəvət olunub, qeyd olunan halın hüquqazidd olması onların diqqətinə çatdırılıb. Həmçinin qızın təhsilinə davam etməsinə nəzarət olunacaq”, - məlumatda vurğulanıb.
Qeyd edək ki, bu yaxınlarda sosial şəbəkələrdə azyaşlının nişanlanması ilə bağlı məlumatlar yayılıb. Yanvarda toyu olacaq 14 yaşlı qızın ailəsi ilə danışıqlar aparılıb və keçiriləcək mərasimin qarşısı alınıb.
Azərbaycanda 2020-ci ildə 165 nəfər 15 yaşınadək qızın nikahı icra hakimiyyətləri tərəfindən qeydə alınıb. Ailə Məcəlləsinə əsasən, ölkədə nikah yaşı 18-dir. Üzrlü səbəblər olduqda nikah yaşı 1 ildən çox olmayaraq azaldıla bilər.
