Dekabrın 11-də saat 15 radələrində 8-10 nəfər “28 May” stansiyasının yaxınlığında karantin rejimi qaydalarına zidd olaraq və icra hakimiyyəti orqanları ilə razılaşdırılmamış toplantı keçirməyə cəhd göstərib. Bu barədə Report Daxili İşlər Nazirliyinə istinadən məlumat verib.
Cəhdin qarşısı polis əməkdaşları tərəfindən alınıb və həmin şəxslər ərazidən uzaqlaşdırılıb. Hadisə ilə bağlı saxlanılan olmayıb.
Sosial şəbəkələrdə yayılan xəbərlərə görə, toplananlar Gədəbəy rayonunun sabiq icra başçısı və Azərbaycan Xalq Cəbhəsi Partiyasının üzvü Saleh Rüstəmovun azadlığa buraxılmasını tələb edib.
Qeyd edək ki, Saleh Rüstəmov 2018-ci ildə saxlanılıb. O, Cinayət Məcəlləsinin “külli miqdarda gəlir əldə etməklə qanunsuz sahibkarlıq”, “mütəşəkkil dəstə tərəfindən cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma” və s. maddələri ilə 7 il müddətinə azadlıqdan məhrum edilib.
