Bu gün, iyunun 3-də “DOST” İş Mərkəzinin nümayəndəsi şirkət tərəfindən Vilyam Hacıyevə qarşı 274 894 manatlıq mülki iddianın qaldırıldığını söyləyib. Bu haqda Report məlumat verib.
Cinayət işi üzrə zərərçəkmiş qismində tanınan “DOST” İş Mərkəzinin İmişli Rayon İcra Hakimiyyətinin həbsdə olan sabiq başçısı Vilyam Hacıyevə qarşı mülki iddiası məhkəmə tərəfindən qəbul edilib.
Həmçinin Kürdəmir Regional Mədəniyyət Mərkəzinin rəhbəri dəymiş 31 000 manatlıq maddi ziyanın ödənilməsini tələb edib.
Məhkəmənin növbəti iclası iyunun 6-sı baş tutacaq.
Vilyam Hacıyev 2020-ci il mayın 5-də Dövlət Təhlükəsizliyi Xidməti tərəfindən saxlanılıb, daha sonra da həbs edilib. O, “vəzifə səlahiyyətlərindən sui-istifadə”, “rüşvət alma”, “mənimsəmə” və “vəzifə saxtakarlığı” maddələrilə ittiham olunur. V.Hacıyev vəzifə cinayətləri ilə yanaşı, qanunsuz silah saxlamaqda da təqsirli bilinib.
Sabiq icra başçısı Bakı Ağır Cinayətlər Məhkəməsində özünü təqsirli hesab etmədiyini deyib. O qeyd edib ki, evində və iş otağında aşkarlanan 6 milyon manatdan çox vəsait həyat yoldaşının babasından miras qalıb, aşkarlanan silahı isə illər öncə rəsmi sənədlə alıb.
