Ölkə xaricində qanunsuz silahlı birləşmələrdə fəaliyyət göstərmiş Azərbaycan vətəndaşı həbs edilib. Bu barədə mayın 20-də Dövlət Təhlükəsizliyi Xidmətindən məlumat verilib.
45 yaşlı Osmanov Akif Aydın oğlunun dini düşmənçilik zəminində ölkədən kənarda terror aktlarının törədildiyi silahlı münaqişələrdə iştirakı müəyyən edilib.
Bundan öncə o, Türkiyədə silahlı terror təşkilatına üzv olma şübhəsi ilə Özbəkistan vətəndaşı kimi saxlanılaraq həbs edilmişdi. Lakin təqsiri sübuta yetirilmədiyi üçün azad edilmişdi.
Həmçinin Akif Osmanovun Suriyada xüsusi hazırlıq düşərgəsində təlimlər keçməsi, dini radikalizm və düşmənçilik zəminində “Azəri Camaatı” adlı qanunsuz silahlı qruplaşmanın fəaliyyətində iştirak etməsi müəyyən olunub.
Qrup üzvləri ilə birlikdə “Şeyx Süleyman” qəsəbəsi uğrunda gedən döyüşlərə qoşularaq qəlpə yarası alması, cinayət məsuliyyətindən yayına bilməsi məqsədilə Özbəkistan vətəndaşının adına saxta pasportla təmin olunması və həmin pasportla müxtəlif ölkələrdə olmasına dair dəlillər əldə edilib.
Akif Osmanov cinayət məsuliyyətinə cəlb olunub, barəsində həbs qətimkan tədbiri seçilib. Hazırda cinayət işi üzrə araşdırmalar davam etdirilir.
