4-cü sanksiyalar paketi ilə Qərb ölkələri Rusiyadan bir sıra məhsulların idxalına qadağa qoyub. Eyni zamanda, şimal qonşumuz da bəzi ərzaq məhsullarının, taxıl və şəkər daxil olmaqla, ixracını payızadək dayandırıb. Nəticə olaraq Rusiya və Ukrayna arasındakı gərginlik qlobal bazarda qiymət artımına səbəb olub. Bu vəziyyətdə Azərbaycan ərzaq təhlükəsizliyini qorumaq üçün hansı addımları ata bilər? Məsələ ilə bağlı iqtisadçı-ekspert Vüqar Bayramov martın 15-də öz Facebook səhifəsində paylaşım edib.
Belə ki, BMT-nin hesablamalarına görə, ərzaq məhsullarının qiymətləri növündən asılı olaraq ən azı 8-22% yüksələcək.
“Azərbaycan bir sıra ərzaq məhsullarının əhəmiyyətli hissəsini xaricdən alır və bu baxımdan da idxal inflyasiyası qaçılmazdır”, - deyə ekspert bildirib.
Vüqar Bayramov əsas strateji ərzaq məhsullarına olan tələbin yerli istehsal hesabına ödənilməsinin vacibliyini vurğulayıb. O, yaranmış vəziyyətdən çıxış yolu olaraq işğaldan azad olunan ərazilərimizin məhsuldar torpaqlarının qısa zamanda əkin fonduna daxil edilməsini təklif edib.
Qeyd edək ki, Rusiya Azərbaycanın ən çox məhsul idxal etdiyi ölkələr arasında birinci yeri tutur.
