Şotlandiyanın Edinburq şəhərində Ermənistanın mina terrorunu əks etdirən məlumat xarakterli aksiya keçirilib. Bu barədə 25 sentyabr tarixində Diasporla İş üzrə Dövlət Komitəsi məlumat verib.
Aksiya Britaniya Azərbaycan Cəmiyyətinin təşkilatçılığı ilə baş tutub.
Müxtəlif şüarları, həştəqləri və məlumatları əks etdirən LED ekranlı yük avtomobilləri Edinburq şəhərinin mərkəzi küçələrində hərəkət edib. 8 saat davam edən aksiya zamanı avtomobillər Edinburqun Royal Mile, Princess Street, George Street, Victoria Street, High Street, North Bridge, Castle Street və digər küçələrindən keçməklə yerli sakinlərin diqqətini cəlb edib.
Məlumatlarda Ermənistan silahlı qüvvələri tərəfindən işğal illərində Azərbaycan torpaqlarında 1,5 milyon mina basdırıldığı, 147 988 hektar ərazinin yüksək səviyyədə, 675 570 hektar ərazinin isə orta və aşağı səviyyədə minalarla çirkləndirildiyi, Ermənistanın Azərbaycana qarşı mina terroru törətməsi nəticəsində 1991-ci ildən bu günə qədər aralarında qadın və uşaqlar da olmaqla 3393 mina qurbanının olduğu kimi faktlar, #stoparmeniancrimes, #MapsForKarabakhSafety, #KarabakhSafety kimi həştəqlər yer alıb.
[gallery link="file" columns="5" size="full" ids="132372,132377,132374,132378,132375"]
