Ötən gün Ermənistan silahlı qüvvələrinin birləşmələri tərəfindən Ağdam rayonunun iriçaplı silahlardan atəşə tutulması nəticəsində yaralanan ekskavator operatorunun vəziyyəti stabildir. Bu barədə 20 sentyabr tarixində APA məlumat verib.
Qəlpə yaraları alan Mehman Həsənov Ağdam Rayon Mərkəzi Xəstəxanasına yerləşdirilib. Sağ diz nahiyəsinin və sol dirsək nahiyəsinin qəlpə yaralanması diaqnozu ilə gətirilən M.Həsənovun yaraları cərrahi işlənilib. Hazırda vəziyyətinin stabil olduğu, müalicəsinin davam etdirildiyi bildirilir.
Mehman Həsənov deyib ki, ərazidə bərpa-quruculuq işləri görən zaman ermənilərin atdığı top mərmisi partlayıb və o, qəlpə yarası alıb.
Mehman Həsənov partlayış nəticəsində dirsək və diz nahiyəsindən xəsarətlər aldığını bildirib: "Ekskavatorçuyam, Ağdamda bərpa-quruculuq işləri görürdük. Həmişəki kimi işimi görürdüm. Anidən partlayış səsləri eşitdim. Həmin vaxt ekskavatorun içərisində idim. Nə baş verdiyini bilmədim. Texnikadan yerə düşən kimi qəlpə yaraları aldım. Texnikaya da ziyan dəyib”.
Hazırkı şəraitdə prokurorluq əməkdaşları tərəfindən mümkün olan istintaq hərəkətləri aparılır.
