4 oktyabr 2020-ci ildə Ermənistan Silahlı Qüvvələri Gəncə şəhərini atəşə tutub. Onların hədəfləri mülki insanlar, yaşayış binaları olub.
Həmin gün 3 raket zərbəsi nəticəsində Gəncənin 36 dinc sakini müxtəlif bədən xəsarətləri almış, 1 mülki şəxs - Əliyev Tunar Qoşqar oğlu həlak olmuşdur. Gəncənin Nəriman Nərimanov, Əziz Əliyev, Əli Nəzmi və digər küçələrində yerləşən evlər tamamilə dağılmış, nəqliyyat vasitələrinə ciddi ziyan dəymişdir.
Azərbaycan məsuliyyəti Ermənistanın daşıdığını bildirdi, lakin qarşı tərəf bu ittihamı rədd etdi. Keçmiş Qondarma Dağlıq Qarabağ rejimi bildirdi ki, onların hədəfi hərbi təyinatlı binalar, həmçinin Gəncə Beynəlxalq Hava Limanıdır. Lakin Gəncədə, ümumiyyətlə, hərbi təyinatlı binalar yox idi və bu günə kimi də yoxdur.
Gəncə şəhəri Vətən müharibəsi zamanı Ermənistan Silahlı Qüvvələri tərəfindən bir neçə dəfə atəşə tutulmuşdur. Nəticədə 6-sı uşaq və yeniyetmə olmaqla 26 nəfər həlak olmuşdur. Baş vermiş hadisələr zamanı müxtəlif dərəcəli bədən xəsarətləri almış dinc sakinlərin sayı 130-a çatmış və onlardan 29-u uşaq olmuşdur.
