Fətəli xanın başdaşı bərpa edilməsi üçün Milli Azərbaycan Tarixi Muzeyinə göndərilib. Bu barədə İnsanoid APA-ya istinadən bu gün, 28 sentyabr tarixində xəbər verir.
Milli Azərbaycan Tarixi Muzeyinin Arxeologiya fondunda qorunan, XVIII əsrin sonlarına aid qubalı Fətəli xana məxsus qəbirdaşının bərpaya ehtiyacı olduğu üçün muzeyin Bərpa laboratoriyasına yönləndirilib.
1789-cu ilin mart ayının 22-də 54 yaşında vəfat edən Fətəli xan Bakıda Bibiheybət məscidinin həyətində dəfn olunub. XX əsrin 30-cu illərində isə Fətəli xanın başdaşı Azərbaycan Tarix Muzeyinə təqdim edilib. Oniks daşından hazırlanmış sözügedən qəbirdaşı üzərində hazırda bərpa-konservasiya işləri aparılır. Bərpadan öncə üzərindəki boya qalıqları polaroid maddə vasitəsi ilə konservasiya edilmiş və daşın üzərindəki firuzəyi, bənövşəyi, qızılı boya qalıqları daha aydın formada üzə çıxmışdır. Eksponatın üzərindəki ləkələr xüsusi maddələrlə-kimyəvi və mexaniki üsulla təmizlənərək, daşın təbii rəngi geri qaytarılıb.
Eksponatın konservasiya və bərpa işləri muzeyin bərpaçı-rəssamı İbrahim Hacıyev tərəfindən icra olunur.
Sözügedən eksponat bərpa prosesindən sonra muzeyin yeni qurulan ekspozisiyasında nümayiş olunacaq.
