Fövqəladə Hallar Nazirliyi (FHN) işğaldan azad olunmuş ərazilərdə müharibənin təhlükəli qalıqları ilə bağlı vətəndaşlara müraciət edib. Bu haqda məlumat dekabrın 7-də qurumun rəsmi saytında yerləşdirilib.
Qeyd edilir ki, azad olunmuş ərazilərdə böyük həcmdə mina və partlamamış hərbi sursatlar qalmaqdadır. Bununla bağlı qurum vətəndaşları bu ərazilərə qeyri-qanuni səfərlərdən çəkinməyə çağırıb.
“Minalarla yanaşı Qarabağ bölgəsində məişət, təsərrüfat əşyaları, uşaq oyuncaqları içərisində yerləşdirilmiş partlayıcı maddələr kiçik toxunuşla faciələrə yol aça bilir. Bu əşyaların ən böyük təhlükəsi isə onların xarici görünüş baxımından aldadıcı olması və uşaqlar üçün cəlbedici görünməsidir”, - deyə məlumatda vurğulanıb.
Vətəndaşlar rast gəlinən hər hansı yad əşyaya toxunmadan FHN-nin “112” və ya Daxili İşlər Nazirliyinin “102” qaynar xəttinə məlumat verə bilərlər.
