Fransanın Moskvadakı səfirliyi qarşısında keçirilən aksiya zamanı saxlanılan azərbaycanlı qadınların nədə ittiham olunduqları məlum olub. Bu barədə AZfront 25 oktyabr tarixində paylaşım edib.
Moskvanın Yakimanka rayonu üzrə polis ispektorunun aksiyadan sonrakı gün 4 qadın barəsində tərtib etdiyi eynitipli protokollarda qeyd edilib: “19 oktyabr 2022-ci il saat 15:20 radələrində Moskva şəhəri, Yanimanka rayonu, ev, 45 ünvanında yerləşən Fransa səfirliyinin qarşısında şəhərin İcra Hakimiyyəti orqanları ilə razılaşdırılmamış ictimai kütləvi tədbir keçirilib”.
Həmçinin saxlanılan qadınların hər biri haqqında bunlar qeyd edilib: “Moskva şəhərinin İH orqanları ilə razılaşdırılmamış piketdə könüllü olaraq iştirak etmiş və bununla da inzibati xəta törətmişdir”. Sözügedən protokola əsasən, saxlanılan qadınlar yazılı izahat verməkdən imtina ediblər.
Xatırladaq ki, oktyabrın 19-u Fransanın Moskvadakı səfirliyi qarşısında azərbaycanlıların iştirakı ilə keçirilən aksiyada 4 qadın saxlanılmışdır.
