Hacıqabul Rayon Polis Şöbəsinin əməkdaşlarının keçirdiyi əməliyyat tədbirləri nəticəsində əcnəbi vətəndaşa 1 000 manat qarşılığında narkokuryerlik edən şəxs saxlanılıb. Bu barədə 29 noyabr tarixində Daxili İşlər Nazirliyi İnsanoid-ə məlumat verib.
Lənkəran rayon sakini İlqar Əmənullayev Hacıqabul rayonunun Navahı kəndi ərazisində saxlanılıb.
Onun əlində olan torbaya keçirilən baxış zamanı 630 qram tiryək, 100 qrama yaxın metamfetamin və 600 qramdan artıq olan marixuana aşkar edilərək götürülüb.
Dindirilmə zamanı İ.Əmənullayev sosial şəbəkə vasitəsilə tanış olduğu "Toral" adlı iranlı narkotacirə narkokuryerlik etdiyini etiraf edərək, ondan aşkarlanan narkotik vasitələri 1 000 manat qarşılığında qabaqcadan təyin olunan yerə çatdırmalı olduğunu bildirib.
Faktla bağlı cinayət işi başlanılıb.
