Şəmkir rayonunda həyat yoldaşı və qızını qətlə yetirən şəxsin məhkəməsinin hazırlıq iclası iyunun 24-də baş tutacaq. Bu haqda iyunun 11-də Report məlumat verib.
Cinayət işi baxılması üçün Gəncə Ağır Cinayətlər Məhkəməsinə göndərilib.
Fevralın 13-də Şəmkir rayonunun Çinarlı qəsəbəsinin 34 yaşlı sakini şəxsi münasibətlər zəminində aralarında yaranan mübahisə zamanı hamilə vəziyyətdə olan həyat yoldaşını və qızını öldürüb. O, saat 07:00 radələrində yataq otağında olan 27 yaşlı həyat yoldaşı və 8 yaşlı qızına çoxsaylı bıçaq zərbələri endirib.
Qətli törədən şəxs “xüsusi amansızlıqla və ya ümumi təhlükəli üsulla adam öldürmə”, “iki və ya daha çox şəxsi öldürmə”, “təqsirkar şəxs üçün aşkar surətdə hamilə vəziyyətində olan qadını öldürmə” və “təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə” maddələrilə ittiham olunub.
