Cari ilin may ayının 31-nə Azərbaycanda əhalinin banklardakı əmanətlərinin həcmi milli valyuta ekvivalentində 10,5 milyard manatdan çox təşkil edib. Bu barədə 22 iyun tarixində dərc edilmiş Mərkəzi Bankın son hesabatında deyilir.
Əmanətlərin 9,4 milyard manatdan çox olan hissəsi Bakı iqtisadi rayonunun əhalisi tərəfindən yerləşdirilib. Abşeron-Xızı zonasının əhalisi 317,7 milyon manatını, Gəncə-Daşkəsən zonasında əhali 161 milyon manatını, Lənkəran-Astara zonasında isə əhali 98,3 milyon manatını banklara etibar edib. Daha sonra ardıcıllıqla Quba-Xaçmaz (94,7 milyon manat), Mərkəzi Aran (87,7 milyon manat), Şəki-Zaqatala (80,1 milyon manat), Qazax-Tovuz (80 milyon manat), Qarabağ (73 milyon manat) və Naxçıvan (62,9 milyon manat) regionları gəlir. Ən az rəqəmlər isə Şirvan-Salyan, Mil-Muğan və Dağlıq Şirvan regionlarına aiddir. Burada əmanətlərin həcmi müvafiq olaraq 50,3 38,5 və 29,7 milyon manat təşkil edib.
Hesabata əsasən, əmanətlərin 58,8%-i milli, 41,2%-i isə xarici valyutada yerləşdirilib.
