Bakıda həyat yoldaşını qətlə yetirməkdə təqsirləndirilən Gülnar Vəlizadənin cinayət işi üzrə məhkəmənin baxış iclası keçirilib. Bu haqda iyulun 4-də Report məlumat paylaşıb.
Zərərçəkmişin 7 yaşlı oğlu anası atasını bıçaqlayarkən gördüyünü deyib: “Atam mənə dedi ki, polisə özü özünü vurduğunu söyləyim. Biz hazırda ata nənəm Mahirə Hadiyevanın himayəsindəyik. İki qardaşıq. Qardaşım məndən üç yaş kiçikdir", - deyə azyaşlı qeyd edib.
Zərərçəkmişin dostu Azad Əsədov isə Elşəni yaralı vəziyyətdə gördüyünü söyləyib: "O, təcili yardımdan imtina etdi. Çünki təcili yardım gəlsə, polisə məlumat veriləcək. Gülnar kartı götürüb aptekdən dərmanlar alıb gətirdi. Elşən mənə dedi ki, onu Gülnar bıçaqlayıb".
Məhkəmənin növbəti iclası iyulun 18-də baş tutacaq.
2022-ci ilin yanvar ayında Bakının Suraxanı rayonu, Hövsan qəsəbəsində 32 yaşlı Elşən Əlizadə 31 yaşlı həyat yoldaşı Gülnar Vəlizadə tərəfindən bıçaqlanıb. Yaralı xəstəxanaya çatdırılıb, lakin onun həyatını xilas etmək mümkün olmayıb.
G.Vəlizadə “qəsdən sağlamlığa ağır zərər vurma, ehtiyatsızlıqdan zərərçəkmiş şəxsin ölümünə səbəb olduqda” maddəsilə ittiham olunub.
