İşğaldan azad edilmiş ərazilərin bərpası Azərbaycanın qarşısında duran əsas hədəflərdən biridir. Bunu dekabrın 11-də Prezidentin köməkçisi Hikmət Hacıyev İstanbulda keçirilən "Stratcom 21" sammitində çıxışı zamanı bildirib.
Onun sözlərinə görə, XXI əsrdə şəhərlərin, kəndlərin bu dərəcədə məhv edilməsi dünya tarixində olmayıb. Prezidentin köməkçisi əlavə edib ki, sanki Ermənistan işğaldan azad edilən ərazilərdə nüvə silahından istifadə edib.
Hikmət Hacıyev Azərbaycanın 90-cı illərdə informasiya savaşına hazır olmadığını vurğulayıb: “Ona görə də Ermənistanın Azərbaycan torpaqlarını işğal etməsinə və bu işğalın terrorla, aqressiv separatizmlə müşayiət olunmasına baxmayaraq, dünya Azərbaycanı qınayırdı. Biz anladıq ki, haqlı olmaq yetərli deyil. Haqlı olduğumuzu dünyaya çatdırmaq daha önəmlidir”.
Prezidentin köməkçisi onu da qeyd edib ki, Ermənistanın törətdiyi vandalizm, vəhşilik fonunda Azərbaycan və Türkiyəyə qarşı iddialar irəli sürməsi qəbuledilməzdir: “Bu qədər vəhşilik törədən Ermənistanın ədalətdən danışmağa mənəvi haqqı yoxdur".
