Pandemiyaya görə qoyulan qaydaların yumşaldılmasından sonra ölkəmizdə turizm sektorunda canlanma başlayıb. Lakin bəzi vətəndaşlar hesab edir ki, xaricdə istirahət etmək ölkədə istirahət etməkdən ucuz başa gəlir. Məsələ ilə bağlı iyunun 21-də Azərbaycan Hotellər və Restoranlar Assosiasiyasının İdarə Heyətinin sədri Samir Dübəndi Trendə danışıb.
Onun sözlərinə görə, hotellərin qiyməti ötən ilə nisbətdə çox da dəyişməsə də, müştərilər hotellərdə bahalıqdan gileylənirlər.
“Təəssüf ki, belə hallara rast gəlirik. Ancaq nəzərə almaq lazımdır ki, vətəndaşlarımız bölgələrdə istirahətə yollanarkən daha çox beşulduzlu hotellərə üstünlük verirlər. Belə hotellərin də hər şəraiti olmaqla yanaşı, öz satış siyasətləri var”, - deyə S.Dübəndi bildirib.
Məsələnin həll yolu kimi sədr qonaq evləri və kempinqlərin yaradılmasını, kiçik hotellərin tikilməsini təklif edib: “Bunların sayı artsa, qiymət seçimi geniş olacaq”.
