Həzi Aslanov 22 yanvar 1910-cu ildə Lənkəran şəhərində anadan olub.
O, ibtidai təhsilini Lənkəranda alıb, 1924-1930-cu illərdə Bakı və Leninqrad hərbi məktəblərində oxuyub. Daha sonra Aslanov Kotovsk adına III Bessarabiya süvari diviziyasında taqım komandiri təyin olunub.
Böyük Vətən müharibəsi başlayan zaman, 23 iyun 1941-ci ildən Həzi Aslanov öz döyüşçüləri ilə Donbas (Ukrayna) ətrafında düşmənin hücumlarını beş ay dəf edib. O, 1941-ci ilin dekabrında Moskva ətrafında vuruşmalara görə “Qırmızı ulduz” ordeni ilə təltif edilib.
Xarkov və Stalinqrad ətrafında gedən döyüşlərdə Aslanovun başçılığı ilə 55-ci tank briqadası vuruşaraq 40 kilometrdən artıq yol gedib, almanları Stalinqrad qruplaşmasının əsas magistralından məhrum edib.
Aslanov öz döyüşçüləri ilə Kotelnikovo (Rusiya) yaxınlığında düşmənin 30 əks-hücumunu dəf edərək bir batalyon piyada qoşununu, 30 tankı, 50 avtomobili sıradan çıxarıblar. Bu döyüşdən sonra Aslanov 22 dekabr 1942-ci ildə Sovet İttifaqı Qəhrəmanı adına layiq görülüb.
13 mart 1944-cü ildə Həzi Aslanova tank qoşunları general mayoru rütbəsi verilib. 1944-cü ilin iyununda Aslanovun tankları Vilnüsə (Litva) hərəkət edərək düşməni ağır itkiyə məruz qoyurlar. Bu döyüşdəki qələbəyə görə Aslanov ikinci dərəcəli Suvorov ordeni ilə təltif edilib.
23-30 iyun 1944-cü ildə Həzi Aslanov Belarusiyanın Pleşşenitsi şəhərini və 508 yaşayış məntəqəsini azad etdi. Ona ikinci dəfə Sovet İttifaqı Qəhrəmanı adı ilə təltif olunması üçün sənəd təqdim edildi. Lakin ona bu ad ölümündən sonra, 1991-ci ildə verildi. O, iki dəfə Sovet İttifaqı Qəhrəmanı adına layiq görülmüş yeganə azərbaycanlıdır.
1 avqust 1944-cü ildə Aslanovun briqadası başqa ordu hissələri ilə birlikdə Yelqava (Latviya) şəhərini düşməndən təmizləyiblər. O, 1944-cü ilin hücum döyüşləri dövründə 8 dəfə Ali Baş Komandanlıq tərəfindən təşəkkür alıb.
Aslanovun polku Rostov, Taqanroq şəhərlərinin azad olunmasında və Kursk vuruşmasında, həmçinin Belorusiya və Pribaltika respublikalarını azad etmək uğrundakı döyüşlərdə iştirak edib.
Həzi Aslanov 24 yanvar 1945-ci ildə Miatva (Latviya) şəhərində dünyasını dəyişib və Bakıda Şəhidlər xiyabanında dəfn olunub.
