“Yüksəliş" müsabiqəsinin onlayn mərhələsinin imtahanında iştirak edən 6 041 nəfər namizəddən 1 202 nəfər növbəti mərhələdə iştirak etmək hüququ qazanıb. Bu barədə müsabiqənin rəsmi saytında məlumat verilib.
Məlumata əsasən, sözügedən müsabiqənin növbəti mərhələyə keçən namizədlərinin 964-ü kişi, 238-i qadındır. İştirakçılar arasında Bakı, Sumqayıt, Gəncə və Daşkəsən şəhərlərindən olan namizədlər üstünlük təşkil edir.
Bildirilib ki, müsabiqədə ədalətli rəqabəti təmin etmək məqsədilə test sualları bir çox beynəlxalq imtahanlarda (Toefl, GMAT, SAT və s.) tətbiq edilən T-şkala ilə qiymətləndirilib. Belə ki, əsasən, maksimal T-bal 744, o cümlədən, keçid balı 560 təyin edilib.
Sözügedən mərhələdən keçən iştirakçıları müsabiqənin əyani mərhələsi gözləyir.
Qeyd olunub ki, “Yüksəliş” müsabiqəsinin 20 qalibini 1 il ərzində idarəçi rəhbərlərdən - iri şirkətlərin top-menecerlərindən və dövlət qurumlarının rəhbərlərindən fərdi karyera məsləhətləri almaq imkanı, kadr ehtiyatı bankına daxil edilmə və 20 000 manat dəyərində pul mükafatı gözləyir.
