İyunun 26-da Azərbaycan Respublikasının Prezidenti İlham Əliyev Laçın rayonunda “Həkəriçay” su anbarı layihəsi ilə tanış olub. Bu barədə 27 iyun tarixində Prezidentin Mətbuat Xidməti məlumat verib.
Məlumata əsasən, Həkəridə tutumu təxminən 90 milyon kubmetr olan su anbarı tikməklə buradakı təmiz suyu 254 kilometr uzunluğunda magistral yolla Sabirabada qədər gətirmək mümkündür. Hazırda layihənin texniki-iqtisadi əsaslandırılması həyata keçirilir.
Qeyd olunub ki, “Həkəriçay” su anbarı içməli suyun toplanması üçün nəzərdə tutulur. Magistral üzərində nasos stansiyalarının tikilməsi ilə nisbətən hündür coğrafi ərazidə yerləşən 7 rayona suyun verilməsi planlaşdırılır. Layihənin istifadəyə verilməsi nəticəsində 3 milyona yaxın insanı içməli su ilə təmin etmək mümkün olacaq.
