İyunun 14-də Azərbaycan Respublikasının Prezidenti İlham Əliyev Slovakiyada keçirilmiş minifutbol üzrə Avropa çempionatının qalibi olan milli komandamızın üzvlərini qəbul edib.
Dövlət başçısının sözlərinə görə, bu, komanda idman növündə ölkəmizin ilk böyük uğurudur: “Oyun idman növlərində belə bir qələbə olmamışdır. Ona görə bu qələbənin çox böyük mənası var və əminəm ki, digər idman növləri üçün bu, çox gözəl nümunədir”.
“Şadam ki, komandamızın tərkibi yerli idmançılardan ibarətdir - həm oyunçular, həm məşqçilər, həm mütəxəssislər. Bu, məni xüsusilə sevindirir”, - deyə İlham Əliyev əlavə edib.
Sonda ölkə başçısı idmançılarımızı təbrik edib və onlara yeni uğurlar arzulayıb: “Əlbəttə ki, bu uğuru təkrarlamaq çox çətin olacaq. Amma əminəm ki, komandamızın perspektivləri də çox gözəldir”.
Qeyd edək ki, 4-11 iyun tarixlərində Slovakiyanın Koşitse şəhərində keçirilən minifutbol üzrə Avropa çempionatının qalibi Azərbaycan yığması olub. Final oyununda millimiz 6 qat Avropa çempionu olan Rumıniyaya 1:0 hesabı ilə qalib gəlib.
