Prezident İlham Əliyev iyunun 26-da, Silahlı Qüvvələr Günündə Kəlbəcər rayonunda hərbi hissənin açılışında iştirak edib. Bu haqda məlumat president.az saytında yerləşdirilib.
Dövlət başçısı Ordumuzun inkişafı üçün yeni silahların və müasir texnikanın Azərbaycana gətiriləcəyini bildirib. Onun sözlərinə görə, bütün sərhəd boyunca hərbi hissələr yaradılıb və növbəti komando hərbi hissələrinin açılması nəzərdə tutulur.
“Əgər Ermənistan sərhədlərin müəyyən edilməsində öz köhnə taktikasına qapılsa, vaxt uzatmağa çalışsa, nəticədə özü peşman olacaq. Biz Ermənistanda baş qaldıran revanşist qüvvələrin hərəkətlərinə diqqətlə baxırıq” - deyə ölkə rəhbəri vurğulayıb.
Ali Baş Komandan dünyanın aparıcı qüvvələrinin postmüharibə reallıqlarını qəbul etdiklərini və öz fəaliyyətlərini bunun əsasında qurduqlarını söyləyib. O, Ermənistanı da bu reallığı qəbul etməyə çağırıb.
Çıxışda, həmçinin azad edilmiş ərazilərdə gedən bərpa işlərindən danışılıb: “Kəlbəcərin infrastrukturu, elektrik təchizatı, su təchizatı, evlərin tikilməsi - artıq buna start verilir. İlk növbədə, hərbi təyinatlı yolları inşa etməliydik və bunu etdik. Qarabağı və Şərqi Zəngəzuru bərpa edəcəyik. Artıq bu proses başlamışdır”.
Qeyd edək ki, iyunun 26-da İlham Əliyev Göygöl, Kəlbəcər və Laçın rayonlarına səfər edib. Dövlət başçısı orada gedən tikinti işləri ilə tanış olub.
