İmişli rayonunun sabiq icra başçısı Vilyam Hacıyevin cinayət işi üzrə növbəti məhkəmə iclası baş tutub. Bu haqda iyunun 10-da Trend məlumat verib.
Yoxlama zamanı müəyyən edilib ki, V.Hacıyevin rəhbərliyi dövründə külli miqdarda vəsait İmişlidə təhsil və məktəbəqədər müəssisələrdə xərclənmək adı ilə silinib.
Sabiq icra başçısının vəkili rəqəmlər arasında böyük fərqin olduğunu vurğulayıb. "Məsələn, aktda İmişli rayon İcra Hakimiyyətinin inzibati binasına ayrılmış vəsait 5 milyon 685 min 699 manat, 4 milyon 493 min manat və ya 898 min manat göstərilib. Rəqəmlərin dəqiq əsaslandırılması üçün mütəxəssis prosesə gəlməlidir", - deyə vəkil qeyd edib.
İyunun 13-də baş tutacaq növbəti məhkəmə prosesində İmişlidə aparılan tikinti işlərinə ayrılan və xərclənmiş vəsaitlərlə bağlı akta baxılacaq.
Vilyam Hacıyev 2020-ci il mayın 5-də Dövlət Təhlükəsizliyi Xidməti tərəfindən saxlanılıb, daha sonra da həbs edilib. O, “vəzifə səlahiyyətlərindən sui-istifadə”, “rüşvət alma”, “mənimsəmə” və “vəzifə saxtakarlığı” maddələrilə ittiham olunur. V.Hacıyev vəzifə cinayətləri ilə yanaşı, qanunsuz silah saxlamaqda da təqsirli bilinib.
