İran səsvermə hüququ olan vətəndaşları üçün İrəvandakı Göy məsciddə seçki məntəqəsi açıb. Bu barədə İnsanoid Report-a istinadən bu gün, 28 iyun tarixində xəbər verir.
Göy məscid və ya Hüseynəli xan məscidi azərbaycanlılara məxsus islam dini ibadət yeri olub. Azərbaycanlılar İrəvandan qovulduqdan sonra bu məscidi ermənilər “fars mədəniyyət abidəsi” kimi təqdim ediblər. Tehran hakimiyyəti məsciddə təmir-bərpa işləri apararaq, orada fars mədəniyyətinə aid elementlər yerləşdirib. Göy məscid 1766-ci ildə İrəvan xanı Hüseynəli xanın əmri ilə tikilib. Azərbaycan memarlıq nümunələrindən biridir. Eni 66 metr, uzunluğu 97,2 metr olan Göy məscid İrəvan məscidləri içərisində ölçüsünə görə ən böyüyü və İrəvan şəhərinin mərkəzi came məscidi olub.
Sözügedən məscid Çar Rusiyası dövründə İrəvanda azərbaycanlıların dini ibadətlərini icra etdikləri 8 məsciddən biri olub. 28 hücrə, kitabxana, ibadətgah və iç həyətdən ibarətdir. Ümumilikdə 7 000 kvadratmetrlik sahəsi olub. İkinci Dünya müharibəsindən sonra sovet hakimiyyətinin ateist siyasətinə uyğun olaraq, hündürlüyü 24 metr olan dörd minarədən üçü sökülüb.
Məscid XX əsrdə ermənilər tərəfindən iki dəfə - 1918-ci ildə, sonra isə 1955-ci ilin martında azərbaycanlı din xadimi Mahmud Aruzoğlu həyat yoldaşı və 22 nəfər türk alimi ilə məsciddə ibadət edərkən yandırılıb.
Qeyd edək ki, iyunun 28-də İranda prezident seçkisi keçirilir.
