Kürdəmir rayonunda bacısını qətlə yetirməkdə təqsirləndirilən Xəyal Şıxaliyevin məhkəməsi başlayır. Bu haqda dekabrın 29-da Report məlumat yayıb.
İş baxılması üçün Lənkəran Ağır Cinayətlər Məhkəməsinə göndərilib. Məhkəmənin növbəti iclası 2022-ci il yanvarın 11-də keçiriləcək.
Hadisə bu il 15 sentyabr tarixində baş verib. Sözügedən şəxs bacısıyla aralarında yaranmış mübahisə zamanı bıçaqla ona çoxsaylı xəsarətlər yetirərək öldürməkdə şübhəli bilinir.
Fakla bağlı “qəsdən adam öldürmə” maddəsi ilə cinayət işi başlanıb.
Azərbaycanda 2021-ci ilin 9 ayı ərzində baş verən qəsdən adam öldürmə və adam öldürməyə cəhd cinayətləri nəticəsində 51 qadın həyatını itirib. Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
